தீவிரவாதத்தை ஊட்டி வளர்த்தவர்கள் இன்று உலகின் முன் கதறிக் கொண்டிருப்பதாக பிரதமர் மோடி பாகிஸ்தானை சாடியுள்ளார். தீவிரவாதிகளை, அவர்களது வீடுகளிலேயே புகுந்து இந்திய ராணுவம் அழித்துக் கொண்டிருப்பதாகவும் அவர் கூறியுள்ளார்.
ஹரியானா மாநிலம் சிர்சாவில் பிரதமர் மோடி தேர்தல் பிரச்சாரம் மேற்கொண்டார். பாகிஸ்தானில் உள்ள கர்தார்பூர் சாஹிப் புனித தலத்தை 70 ஆண்டுகளாக பைனாகுலரில் பார்த்துக் கொண்டிருந்த நிலைக்கு முடிவுகட்டியிருப்பதாகவும், கர்தார்பூர் பாதை அமைக்கும் பணி கிட்டத்தட்ட நிறைவடைந்துவிட்டதாகவும் அவர் கூறினார்.
1947ஆம் ஆண்டில் பிரிவினையின்போது எல்லையை வகுத்தவர்கள் ஒரு 4 கிலோமீட்டர் தூரம் தாண்டி சிந்தித்திருந்தால், குருவிடமிருந்து பக்தர்களை பிரித்துவைக்க வேண்டிய நிலை வந்திருக்காது என்றும் அவர் காங்கிரசை சாடினார்.
காங்கிரஸ் கட்சி இந்தியாவின் கலாச்சாரத்தை ஒருபோதும் மதித்ததில்லை என்றும் மோடி குற்றம்சாட்டினார்.
டெல்லியில் இருந்த அரசு தூங்கிக் கொண்டிருந்ததால் காஷ்மீரின் நிலை மோசமாகி, தற்போது பாகிஸ்தான் ஆக்கிரமிப்பில் உள்ள காஷ்மீர் பகுதி பறிபோனதாகவும், ஜம்மு, லடாக் பகுதிகளுக்கு பாரபட்சம் காட்டப்பட்டதாகவும் அவர் கூறினார். கொலை, பாலியல் வன்முறைகள் மூலம் பண்டிட்டுகள் காஷ்மீரிலிருந்து விரட்டப்பட்டதாகவும் அவர் குற்றம்சாட்டினார்.
பின்னர், ஹரியானா மாநிலம் ரேவாரியில் ((Rewari)) பிரதமர் மோடி தேர்தல் பிரச்சாரம் மேற்கொண்டார். நாட்டில் முன்னர் குண்டுவெடிப்புகள் நிகழ்ந்துகொண்டிருந்த நிலைக்கு முற்றுப்புள்ளி வைக்கப்பட்டிருப்பதாக அப்போது குறிப்பிட்டார்.
இந்திய ராணுவம் தீவிரவாதிகளை அவர்களது வீடுகளுக்குள் புகுந்து கொன்றொழிப்பதாகவும், தீவிரவாதத்தை ஊட்டி வளர்த்தவர்கள் இன்று உலகின் முன் கதறி அழுதுகொண்டிருப்பதாகவும் அவர் கூறினார்.
பாஜக ஆட்சிக்கு வந்த பிறகு, படைகளை வலிமைப்படுத்தும் திட்டங்கள் தொடங்கப்பட்டதாகவும், இன்று மிகவும் மேம்பட்ட நீர்மூழ்கிக் கப்பல்கள் தொடங்கி ரஃபேல் போன்ற அதிநவீன போர் விமானங்கள் வரை இடம்பெற்றிருப்பதாகவும் பிரதமர் தெரிவித்தார்.
முன்னர் இருந்த அரசு தேஜாஸ் போன்ற விமானங்களை மேம்படுத்தவில்லை என்றும், இன்று கடற்படை மற்றும் விமானப் படையில் ஈடுபடுத்த அவை தயாராக இருப்பதாகவும் மோடி கூறினார்.
