இலங்கையில் தமிழர் பகுதிகளில் ராணுவம் குவிக்கப்பட்டிருப்பதற்கும், தெருக்களில் தமிழ் பெயர்கள் அழிக்கப்படுவதற்கும் திமுக தலைவர் மு.க. ஸ்டாலின் கண்டனம் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில், ராஜபக்ச குழுமத்தின் புதிய அரசில், தமிழர்களுக்கு நேர்ந்துள்ள நெருக்கடி குறித்து, இந்திய அரசு உன்னிப்பாகக் கவனித்து, உரிய நடவடிக்கைகளை எடுக்க வேண்டும் என அவர் வலியுறுத்தியுள்ளார்.
ஈழத்தமிழர்கள் அரசமைப்புச் சட்ட ரீதியிலான உரிமைகளுடன் அமைதியாக வாழ்வதற்கும், அவர்கள் விரும்பும் தீர்வு ஏற்படுவதற்கும் ஆவன செய்திட வேண்டும் என்று பிரதமர் மோடியை மு.க.ஸ்டாலின் கேட்டுக் கொண்டுள்ளார்.
ஈழத்தமிழர் பிரச்சினையை கோத்தபயவிடம் உரிய முறையில் எடுத்துரைத்து, ஈழத் தமிழர்களுக்கு உதவிடும் அக்கறையான நடைமுறையை மேற்கொள்ள மோடி வலியுறுத்துவார் என நம்புவதாகவும் மு.க.ஸ்டாலின் குறிப்பிட்டுள்ளார்.
