தேசிய பளுதூக்குதல் போட்டி மீராபாய் சானு தேசிய சாதனை!

ஒலிம்பிக் போட்டிக்கு முன்னதாக 210 கிலோ எடையை தூக்க முடியும் என நம்புவதாக, பளுதூக்குதலில் புதிய தேசிய சாதனை நிகழ்த்தியுள்ள மணிப்பூரை சேர்ந்த வீராங்கனை மீராபாய் சானு விருப்பம் தெரிவித்துள்ளார்.

தேசிய பளுதூக்குதல் சாம்பியன்ஷிப் போட்டி கொல்கத்தாவில் நடைபெற்றுவருகிறது. இதில் நேற்று நடந்த மகளிருக்கான 49 கிலோ எடைப்பிரிவில் 25 வயதான மணிப்பூரை சேர்ந்த வீராங்கனை மீராபாய் சானு பங்கேற்றார். ‘ஸ்னாட்ச்‘ முறையில் 88 கிலோ, ‘கிளீன் அண்ட் ஜெர்க்‘ முறையில் 115 கிலோ என மொத்தம் 203 கிலோ எடையை தூக்கி மீராபாய், புதிய தேசிய சாதனை நிகழ்த்தினார். இதன்மூலம், தனது முந்தைய சாதனையை அவர் முறியடித்துள்ளார். இதற்கு முன்பு கடந்த ஆண்டு செப்டம்பர் மாதம் தாய்லாந்தில் நடந்த உலக சாம்பியன்ஷிப் போட்டியில் அவர் 201 கிலோ எடை தூக்கியதே தேசிய சாதனையாக இருந்தது.

புதிய தேசிய சாதனை நிகழ்த்தியதன் மூலம், உலக தரவரிசையில் மீராபாய் 4-வது இடத்திற்கு முன்னேறியுள்ளார். இந்த சாதனை வெற்றிக்கு பின்னர் மீராபாய் சானு அளித்த பேட்டியில், எங்களது திட்டத்தின்படி, எல்லாம் சரியாக நடந்து கொண்டிருக்கிறது. ஆசிய சாம்பியன்ஷிப் போட்டியில் 206 முதல் 207 கிலோ எடை தூக்க வேண்டும் என்பதே இலக்காகும். மேலும், ஒலிம்பிக் போட்டிக்கு முன்பாக 210 கிலோ எடையை தூக்க முடியும் என நம்புகிறேன் என்று தெரிவித்தார்.